اسكت ...... اتكلم ..... اصرخ

جوا الزنزانة الضلمه

وقفنا كلنا انتباه

جوا الزنزانة الضلمه

نسمع صوت هنا و هناك

صوت القران بيترتل

و صوت ترتيل المسيح

صوت بيتكلم في السياسة

و صوت بيتكلم في معاناة انسان في الصقيع

مش باين ملامح و لا حتي ضوء

اللي بيميز بينا هو نبرة الصوت

و في يوم دخل ضيف جديد وسط الزنزانة

عرفناه من اسئلته الكتير

لسه مش واخد ع الجو الكئيب

لسه مش عارف يتعامل مع الضلمه

وفجاءة في يوم صحينا علي صوته

بيصرخ وسط الزنزانه

الشعب يريد اسقاط النظام

الكل محدش رد و كانه وقت السكوت

كان الساعة وقفت و الكل بقي في حالة ثبوت

قام نفس الصوت هتف تاني

الشعب يريد اسقاط النظام

رد واحد ورا واحد ورا واحد

نفس الصوت اللي كان بيرتل الايات مع نفس الصوت اللي مجد المسيح

و الهتاف كبر و كبر و ملا الفراغ

يسقط يسقط النظام

يسقط الجهل و الضلمه و الخوف

يسقط اللي حط في الزنزانة ملايين

و زرع في القلوب جبن مالوف

قام الصوت تاني

قال ارحل خلي الشعب يشوف النور

ارحل يلا غور

الصوت علي و علي و علي

الصوت هد سور الزنزانة

حسسنا بعار الخنوع

لاول مرة شوفنا النور

صرخ الصوت اطلع مفيش رجوع

و فجاة سمعنا ضرب رصاص

صرخ الصوت تاني ارحل

صرخنا وراه بكل قوة

ارحــــــــــل

فجاءة الصوت سكت
منا اللي سكت و ادار وجهه للرجوع
و الباقي صرخ اطلع ادام مفيش رجوع
و نسمع صوت الهتاف ويا صوت الرصاص
بقي شئ مألوف
و الكل يصرخ مفيش مكان للخوف
الرصاص مبيفرقش اهتف
الرصاص مفرقش بين مسلم او مسيحي
الرصاص اصاب
مصري حر طالب بحقه
الرصاصة اللي حتقتلك مش حتسمع صوتها
عار عليك ان تموت جبان
بس الجبان مبيموتش
اللي بيموت بس الشجعان
اما الجبان بيصعد علي جثث الشجعان
و بيحكم
في اي زمان و مكان
رحم الله الشجعان و ننتظر ان ينتقم من كل جبان