غنوة ممنوعه

يا غنوتي الممنوعه
من الكشوف مرفوعه
و برضه مش مسموعه
برغم ان لحنك حرية
و لونك وطنية
و كرمتك ابيه
لكن برضه ممنوعه
بالدم مكتوبه
علي حيط الزنزانة مخطوطة
جوا الظلام تحوليه نور
جوه المعتقلات ما يبور
من جوه الحناجر تطلع
يا شمس بنور
غنوتي الممنوعه
ستين سنة موجوعه
من الظهور ممنوعه
من الدندنة ممنوعه
من العزف ممنوعه
غنوتي مش ملكي
دي ملك كل حر يغنيها
غنوتي سهلة و بسيطة
مكتوبه جوا كل معتقل
جوا كل زنزانة
انا اللي محبوس هنا
محبوس علشان رفضت الاهانة
و الاستهانة
انا اللي رفضت ان يستخفوا بعقلي
انا اللي هتفت بسقوط كل قيصر
انا اللي هتفت يسقط يسقط حكم العسكر
انا الي هتفت ان مصر حتفضل حره
انا اللي ضد ظلم العسكر
اللي ملوا المعتقالات مننا
و استحلوا عرضنا و دمنا
و في الشوارع سحلونا
و علي قاضي تحقيق عسكري ودونا
و قررونا و بهدلونا و طلعوا عين ابونا
و جوه الزنزانه العتمه خلونا
فكرهم انهم حيموتونا
ولا علي الحلم يرجعونا
لكن يا مصر بكره الفجر ينور سماكي
بكره العدل يعود ضناكي
بكره الشعب يرجع تاني
يحكم و لا يتحكم من اناني
احنا الشعب الخط الاحمر
الغنوة حلم في قلبي حتكبر
و انزل تاني في الشوارع اكتر و اكتر
و اهتف باعلي صوت
يسقط يسقط حكم العسكر
يسقط يسقط حكم العسكر
يسقط يسقط حكم المجزر
يسقط يسقط حكم العسكر