مدن تحت الاحتلال

قالولي اختار
بين الاستبن و بين جزمة الغدار
قالولي اختار
بين حكم الجماعة و حكم مشير حمار
قالولي اختار
بين انك تتكفر او تموت بالنار
قالولي اختار
حلمك مش حيشوف النهار
دمك مش حيتجبله تار
قالولي اختار
تعيش متطاي راسك
ولا تضرب بالنار
قالولي اختار
بين ميزان كفة مايلة للمرشد
و بين سلم صاحب الطيار اللي سرق من قوتنا بالمليار
قالولي اختار
بين اللي خزق عين حرارة بايده و بين اللي بسكوته حول
نور عنيه ظلام
قالولي اختار
بين ممثل بارع ابكي الناس و بين اللي ببلطجيته بكي ناس
قالولي اختار
اختار ايه يا بيه
هو الدم فيه اختيار
ولا العرض فيه اختيار
ولا القصاص فيه اختيار
يا بيه
الساكت عن الحق شيطان
و اللي يقتل نفس بغير نفس شيطان
ابقي اختار مين بين الشيطان و الشيطان
انا مش عايز شياطين
تضحك عليا باسم مين
انا مش شيطان
انا عاشق غلبان
درويش لحب الوطن
درويش
راضي بتوبي المرقع
راضي اعيش درويش
في السلطة مليش
في الحكم ماليش
بس نفسي اعيش حر متخنئنيش
راضي بعشتي في عشة بوص
راضي انام علي الخوص
بس بالظلم انا مرضاش
و لو كنت عايش بلاش
بس الحرية
تكفيني
تخليني
تحميني
من شر اللائام